بشكل أساسي يلي عم تقولو انو خلينا نحول البتكوين لعملة ورقية, والفكرة من البتكوين هي مختلفة كليا.
علم الاقتصاد بالجوهر هو فلسفة مبنية على تجارب سابقة و على مشاهدات لكيفية سير الأحداث و الاجراءات الاقتصادية, فهو شي قابل للتغيير, فحتى تقول انو فكرة البتكوين بتحديد عدد العملة الموجودة ما بتشتغل, فلازم يكون عندك تجربة بالموضوع و فعليا ما كان عنا تجربة فعلية لمصاري انكماشية, لان حتى الذهب تم استخدامو متل العملات الورقية, متل ما صار باليونان حوالي ٤١٧ قبل الميلاد, لان صار في صك للذهب و هو الوحيد المعترف فيه ضمن الدولة و المجموعة الحاكمة هي يلي بتتحكم بصك الذهب, ومشان يعملو مصاري اكتر صارو يضيفو معادن تانية متل النحاس للصك والهدف الأساسي هو تمويل الحرب, و نفس الشي صار مع اميركا, لما قررو يلغو ارتباط الدولار بالذهب الصافي, كان السبب هو الطباعة الزايدة لتمويل حرب الفيتنام يلي استمرت لسنيين طويلة.
بالنسبة لموضوع انو لازم نطبع مصاري اكتر مشان تتوافق مع النمو الاقتصادي برايي هي فكرة مصدعة و تداعياتها في حال صار في انكماش بالاتقصاد اسواء بكتير من وجود مصاري انكماشية, و شغلة تانية كمان انو هي القيمة يلي عم تنضاف للاقتصاد عم يتم توزيعها على عملة جديدة عم تروح بالغالب لجيوب الأغنياء وما عم تنضاف هي القيمة للمصاري يلي موجودة بين ايدينا, وهاد الشي يلي خلق هي الطبقية يلي عايشينها والنظام الاستهلاكي العلقانين فيه ويلي بدوره عم يخلق بضائع مالها اي ستين طعمة بس مشان نوجد نمو اقتصادي مالو حقيقي و المضار منو اكتر من النفع على المدى الطويل.
علم الاقتصاد رح يتغير وعم يتغير مع تبني البتكوين و انتشارو و فهم الأشخاص شوي شوي للأفكار و المبادئ الموجودة ضمن هالنظام الجديد, مافيك تجيب نظام او علم اقتصادي مبني اساسا على رأي البنوك المركزية و الحكومات و تبني عليه رأيك لكيف نظام البتكوين لازم يكون, لازم تفهم هالنظام الجديد والقوانين و الانظمة تبعو لحتى تشكل رأيك و بالتالي اقتراحاتك.