Omo the country hard, I no go lie, to make am for this country na die. I don tire to complain, the price of fuel no de reduce at all, we just de lived as if we no de live, this country na wahala full am. People de para because money no de, the government self no even de look our faces, instead they keep embezzlement of public funds for their selfish interests, our politicians de always jakpa when things don hard for the country, and na still dem go come out make we cast our vote when election time come. Perhaps make we hope for the very best because God dey.
Nigeria don tire everybody, things just dey hard anyhow on a daily basis, everybody wan japa but e no dey possible, all of us no fit japa commot for country, so we wey dey make we just dey rugged am dey go one day we go make am. Make we just dey hustle( legit hustling) and we go make am. D current administration don enter and him don commot subsidy already, prices of things just dey increase anyhow but since him just dey enter make we see Wetin him go do, make we give am time. Because me I still get believe say before things go better for dis country we go see shege first, nobody go just come fix Nigeria easily, things don too spoil pass normal, and one person no fit fix dis country because if president no corrupt and people wey dey under am corrupt nothing go still change, and most people get corrupt mindset now even we youth, na just few of us get clean mind.
I no dey even complain about our politicians again, because we sabi d once wey no good and d few once wey good among them, but we still decide to vote for d once wey no good, so na all of us go see shege together now. Election time go reach dey go come dey share small small money give us we go forget all d shege wey we don see we go still vote for them again. Make we wise up make we no dey vote for party again, both pdp, Apc and Lp get better people and bad people for inside, make we dey vote for people and not party.