Intehai afsosnak waqiya, kal Jumme k din, 27th June, 2025, Swat men aek Tourist location pe takreeban 17 se 19 log sailabi pani men beh gaye, jin men se abitak 10 logon ki dead bodies nikal li gai hain aur baqi missing hain. Yeh waqiya kuch yun pesh aya k yeh sare log pani k beech men aek jaga pe tasveer banane k liye gaye jahan pe pathar wagera they aur pani kam tha, chonke tez barish horhi thi toh is waja se Swat River se pani ka bahao achanak se boht tez hogya aur wo wahan se nikal na paye.

Afsos ki baat yeh hai k wo kaafi der tak wahin par karhe rahe, cheekte chillate rahe, rote rahe madad k liye pukarte rahe lekin afsos koi rescue team, koi helicopter, koi bhi unko bachane k liye waqt pe nai pohnch saka, aur jaise jaise pani upr charhta gaya, wo sab log aek aek kr k usmen beh k chale gaye.

Sawaal yahan pe yeh paida hota hai k aakir jab aam awaam pe baat aati hai, toh hamari government aur hamare adaare itne sust q parh jaate hain? Abi farz kren agar yeh koi aam khandan k log na hote balke kisi bade gharane se inka taluq hota, inke jaga jaga links hote politicians se inke rishte ya rabte hote, toh wahan aek kia kahi sare helicopter ya rescue zaraye pohnch jate unko bachane k liye, lekin kyunke yeh aam log they, inki jaanon ki toh koi ahmiyat hi nahin thi.